Real Madrid kjöldró Barcelona

Real Madrid vann 4-1 stórsigur á Barcelona á heimavelli sínum í kvöld. Eiður Smári Guðjohnsen mátti þola að vera skipt út af á 24. mínútu leiksins.

Eiður Smári var í byrjunarliðinu í fjarveru Deco en eftir að Real Madrid komst í 2-0 með mörkum Raul og Arjen Robben ákvað Frank Rijkaard, stjóri Barcelona, að skipta Giovani Dos Santos inn á kostnað Eiðs Smára.

Í síðari hálfleik skoruðu varamennirnir Gonzalo Higuain og Ruud van Nistelrooy fyrir Real Madrid aðeins tveimur mínútum eftir að þeir komu inn á.

Thierry Henry náði svo að minnka muninn á 87. mínútu með laglegu skoti eftir sendingu Lionel Messi sem virtist einn vera klár í slaginn í kvöld. Aðrir leikmenn Barcelona voru langt frá sínu besta.

Leikmenn Real Madrid léku við hvern sinn fingur í kvöld og nutu því að fagna Spánarmeistaratitlinum sem þeir tryggðu sér um síðustu helgi með því að pakka saman erkifjendunum í Barcelona.

Tvær umferðir eru eftir í deildinni og er Real Madrid nú með sautján stiga forskot á Börsunga sem er í þriðja sæti. Villarreal er í öðru sæti, tíu stigum á eftir Real Madrid.

Valencia fór fyrr í kvöld langt með að tryggja sæti sitt í deildinni með 2-0 sigri á Real Zaragosa sem á enn í harðri fallbaráttu.

Real Murcia og Levante eru þegar fallin en þrjú stig skilja að liðin fjögur í 15.-18. sæti. Þau eru Valladolid (43 stig), Zaragoza (41), Recreativo (40) og Osasuna (40).

Úrslit annarra leikja:

Real Betis - Valladolid 1-1

Deportivo - Levante 1-0

Getafe - Almeria 4-2

Mallorca - Osasuna 2-1

Real Murcia - Athletic 1-2

Recreativo - Villarreal 0-2