Eiður húðskammaði Henry

Samkvæmt frétt sem birtist í Marca mun Eiður Smári Guðjohnsen hafa húðskammað liðsfélaga sína eftir 2-0 tap liðsins fyrir Getafe um síðustu helgi.

Eiður mun hafa verið allt annað en sáttur við frammistöðu sinna manna en hann kom ekki við sögu í leiknum en sat á varamannabekk liðsins.

Hann er sagður hafa húðskammað Frakkann Thierry Henry fyrir leti og karaktersleysi. Í fréttinni segir að virðing sé borin fyrir Eiði í búningsklefa Barcelona-liðsins og að menn hafi hlustað heldur niðurlútir á ræðu Eiðs Smára.

Eiður var í byrjunarliði Börsunga í spænsku bikarkeppninni í fyrradag þar sem hann lék á als oddi og lagði upp tvö góð færi fyrir Henry en hann skoraði úr öðru þeirra. Eiður skoraði svo sjálfur annað mark liðsins úr vítaspyrnu og uppskar mikið hrós þjálfara síns, Frank Rijkaard, fyrir frammistöðuna.