Dalurinn á ný í sögulegu lágmarki gagnvart evru

Gengi evru fór enn í methæðir gagnvart bandaríkjadal í dag en munurinn á gengi myntanna hefur aldrei verið lægra. Gengi dals hefur lækkað nokkuð síðustu daga, ekki síst eftir að seðlabanki Bandaríkjanna lækkaði stýrivexti um 50 punkta á þriðjudag. Dalurinn kostaði jafn mikið og kanadískur dalur í gær en slíkt hefur ekki gerst í rúm þrjátíu ár.

Á meðal þess sem veikti gengi bandaríkjadals í dag voru ummæli Bens Bernanke, seðlabankastjóra Bandaríkjanna, sem varaði við því í gær að fasteignalánasamdrátturinn vestanhafs ætti enn eftir að versna.

Þetta þýðir að ein evra kostar 1,41 bandaríkjadal í dag, einu senti meira en í gær, og hefur aldrei verið dýrari.

Veikt gengi bandaríkjadals gagnvart evru hefur kosti og ókosti. Kostirnir fyrir íbúa evrusvæðisins eru þeir að vörur sem fluttar eru inn frá Bandaríkjunum eða greitt fyrir í dölum, svo sem olía og hrávara, verða ódýrari. Á móti gæti gengismunurinn valdið því að draga gæti úr útflutningi frá evrusvæðinu. Að sama skapi gæti það dregið úr innflutningi á erlendum varningi til Bandaríkjanna.