Breski seðlabankinn gagnrýndur fyrir sein viðbrögð

Mervyn King, seðlabankastjóri Englandsbanka, sagði fyrir breskri þingnefnd í dag, að lög í Bretlandi og innan Evrópusambandsins, hafi komið í veg fyrir að bankinn hefði getað beitt sér fyrir því að koma bönkum og fjármálafyrirtækjum á borð við Norther Rock til bjargar strax þegar óróleika varð vart á fjármálamörkuðum í sumar.

Gengi bréfa í Nothern Rock, sem er með stærstu fasteignalánafyrirtækjum í Bretlandi, hefur fallið um heil 82 prósent í bresku kauphöllinni síðan í lok febrúar. Þar af féll gengi bréfa í fyrirtækinu um 30 prósent strax á föstudag og á ný um rúm 17 prósent í dag.

King, sem hefur verið harðlega gagnrýndur fyrir að hafa brugðist seint og illa við, sagði að Englandsbanki hefði getað gripið fyrr í taumana og veitt fjármálafyrirtækjum aðgang að ódýru lánsfé og öðrum úrræðum hefðu lög leyft slíkt. Þess háttar möguleiki hefði komið í veg fyrir að taugaveiklun greip um sig á meðal viðskiptavina Northern Rock, að hans sögn.

Að sögn fréttaveitunnar Bloomberg hefði verið hægt að koma í veg fyrir þrengingar Nothern Rock, svo sem með sölu bankans og samruna hans við annað fjármálafyrirtæki. Mervyn King sagði breskum fjármálafyrirtækjum þröngur stakkur skorinn. Erfitt væri fyrir þau að nálgast fjármagn auk þess sem yfirtökuferli fjármálastofnana í Bretlandi væri erfitt og seinlegt.

Englandsbanki greindi frá því á föstudag í síðustu viku að hann hefði veitt forsvarsmönnum Northern Rock leyfi til að nýta sér neyðarlán bankans ef svo bæri undir. Viðskiptavinir lánafyrirtækisins urðu taugaskelkaðir við þetta og tóku út háar fjárhæðir af innlánsreikningum sínum í bankanum um helgina.