Saviola í skýjunum með fyrsta markið

Argentínski framherjinn Javier Saviola skoraði sitt fyrsta mark fyrir Real Madrid í gær þegar liðið vann sigur á Almeria í spænsku deildinni. Saviola var keyptur til Real frá Barcelona í sumar og var ekki lengi að launa forráðamönnum félagsins traustið.

"Ég var rosalega spenntur þegar ég skoraði því mig hafði dreymt um það lengi að skora mitt fyrsta mark fyrir Real. Ég vildi umfram allt sýna það að félagið hefði gert rétt með því að fá mig hingað," sagði Saviola. Hann óttast ekki að fá ekki nóg af tækifærum með liðinu í vetur.

"Það er svo mikið af leikjum á dagskránni. Landsleikir, Evrópa, deild og bikar, svo ég hef ekki áhyggjur af því að fá ekki að spila. Við fáum allir tækifæri og ég verð tilbúinn þegar kallið kemur," sagði Saviola.