Ósæmileg meðferð kirkjumuna

Tveir 17 ára piltar voru handteknir á höfuðborgarsvæðinu á dögunum en þeir voru með hvítan trékross í eftirdragi. Á krossinum var áletrað nafn látins einstaklings. Aðspurðir sögðust piltarnir hafa fundið krossinn fyrir tilviljun á víðavangi og ætluðu að gera úr honum listaverk.

Piltarnir voru margsaga og gátu ekki vísað á fundarstaðinn. Þeim var gerð grein fyrir alvarleika málsins og sögðu þá að eigandinn myndi ekki sakna krossins enda væri sá farinn yfir móðuna miklu.

Við eftirgrennslan lögreglu kom í ljós að krossinn var tekinn úr kirkjugarði en málið er nú til frekari rannsóknar. Fleira fannst í fórum piltanna og voru skýringar þeirra lítt trúverðugar sem fyrr.