Laudrup: Villarreal verður að halda auðmýktinni

Michael Laudrup, nýráðinn þjálfari spænska liðsins Villarreal, segir að félagið verði að halda þeirri auðmýkt sem einkennt hefur leik liðsins síðustu ár til að geta náð góðum árangri í Evrópukeppni félagsliða á næsta tímabili.

Villarreal hefur á örfáum árum orðið eitt af bestu liðum Spánar og Laudrup veit að það er ekki auðvelt að halda sér á meðal þeirra bestu og ná stöðugleika. "Allir vita að það er erfitt að brjótast í efri helming deildarinnar fyrir félag eins og Villarreal, en það er enn erfiðara verkefni að halda sér á meðal þeirra bestu. Það verður enn erfiðara fyrir okkur á næstu leiktíð þar sem við spilum fleiri leiki og verðum með í Evrópukeppninni.

Við getum ekki leyft okkur að slaka á í einni eða annari keppni eins og hefur sýnt sig hjá öðrum liðum sem eru ekki vön að spila í Evrópu. Bikarinn og Evrópukeppnin eru þannig mikilvægar keppnir fyrir okkur - en deildin verður alltaf að hafa forgang," sagði Laudrup. Hann fær það erfiða verkefni að taka við af Bernd Schuster sem náði níunda sætinu í deildinni með liðið tvö ár í röð.

"Það góða við að taka við Getafe er það að menn hér á bæ gera sér grein fyrir því að það er ekki hægt að gera kröfur um að komast í Evrópukeppni eða vinna titla. Félagið er nýkomið upp á meðal þeirra bestu og við verðum að læra af því að spila í þremur keppnum á næstu leiktíð," sagði Daninn.