Beckham hrósar Alex Ferguson

David Beckham hrósaði fyrrum knattspyrnustjóra sínum Alex Ferguson í hástert í gær þegar hann stýrði Manchester United enn á ný til Englandsmeistaratignar. "Ég verð aldrei hissa á því þegar Alex Ferguson nær árangri því hann nær alltaf að snúa á þá sem efast um hæfileika hans," sagði Beckham eftir góðan sigur hans manna í Real Madrid í gær.

"Ferguson veit hve góðir þeir Benitez, Wenger og Mourinho eru og hann ber virðingu fyrir þeim. En sem knattspyrnustjóri - er erfitt fyrir nokkurn mann að toppa það sem Alex hefur gert á ferlinum. Hann sér alltaf til þess að leikmenn hans hungri í fleiri titla og ég gæti ekki verið ánægðari með þessi tíðindi sem stuðningsmaður Manchester United. Strákarnir eiga eftir að fagna þessu vel og einbeita sér svo að úrslitaleiknum í bikarnum," sagði Beckham.