Vænta mikils af samvinnu við Ingibjörgu

Mona Sahlin leiðtogi sænskra jafnaðarmanna og Helle Thorning-Schmidt leiðtogi danskra jafnaðarmanna segja að jafnaðarmenn á Norðurlöndum vænti mikils af samvinnu við Ingibjörgu Sólrúnu Gísladóttur ef Samfylkingin kemst til valda á Íslandi. Þær eru sérstakir gestir á landsfundi flokksins.

Þær Mona og Helle komu til landsins í dag og mættu beint á landsfundinn í Egilshöll. Þrjár konur eru nú formenn jafnaðarmannaflokka á Norðurlöndunum og telja þær báðar það ótvírætt skipta máli. Mikilvægt sé að allir geti fundið sig í stjórnmálum, þau séu ekki bara fyrir karlmenn heldur fyrir alla. Aðspurðar um stöðu jafnaðarmannaflokka voru þær sammála um að hún væri sterk. Væntingarnar væru líka miklar og mikil vinna framundan.