Varnarmálaráðuneytið lengir dvöl hermanna á vígstöðvum

Bandarískir hermenn í Írak og Afganistan þurfa framvegis að vera 15 mánuði í stað eins árs á vígstöðvunum samkvæmt nýjum reglum sem Robert Gates, varnarmálaráðherra Bandaríkjanna, kynnti í dag.

Markmiðið með þessum breytingum er að tryggja að nægur mannskapur verði í löndunum til að takast á við þau erfiðu verkefni sem Bandaríkjaher fæst við þar, en í báðum löndum stendur yfir hatrömm barátta við uppreisnarmenn.

Nýju reglurnar gera jafnfram ráð fyrir að hermenn fái að minnsta kosti eins árs frí frá bardögum þegar þeir snúa heim. Gates viðurkenndi í dag að mikið álag væri á bandaríska hernum vegna aðgerðanna í Írak og Afganistan en stjórnmálaskýrendur segja að með nýju reglunum sé verið að forðast það að herinn lendi í vandræðum á næstu árum.

Alls eru um 145 þúsund bandarískir hermenn í Írak og ná reglurnar til þeirra og þess hóps sem senda á til Íraks á næstunni.

Auk þessa leitar Bandaríkjastjórn að stríðsstjóra til þess að stýra aðgerðum og uppbyggingu í bæði Írak og Afganistan. Eftir því sem Washington Post greinir frá hafa þrír hershöfðingjar innnar Bandaríkjahers neitað að taka að sér starfið.