Stóraðgerð lögreglu á Suðurnesjum

Tugir lögreglumanna og tollvarða á Suðurnesjum tóku þátt í stórri aðgerð í gærkvöld til að stemma stigu við vaxandi umsvifum fíkniefnasala í umdæminu. Farið var í sex húsleitir, tólf voru handteknir og hald lagt á talsvert af fíkniefnum.

Suðurnesjalögreglan að reyna að koma böndum á fíkniefnabrotamenn sem hafa verið umsvifamiklir í umdæminu síðustu misseri, að mati lögreglunnar. Ráðist var í stóra rassíu. 36 lögreglumenn af Suðurnesjum og frá sérsveit og greiningardeild Ríkislögreglustjóra auk fjögurra tollvarða með tvo fíkniefnahunda tóku þátt í aðgerðunum. Farið var samtímis í fimm húsleitir snemma í gærkvöld og fundust fíkniefni á öllum stöðum. Níu menn voru handteknir og yfirheyrðir. Um miðnætti var farið í eina húsleit til og þar lagt hald á meira af fíkniefnum og þrír menn handteknir. Mönnunum var sleppt að lokinni yfirheyrslu. Lögreglusveitin lét ekki staðar numið í gærkvöld því farið var á skemmtistaði og gerð líkamsleit á um 20 einstaklingum. Samtals var því farið í sex húsleitir og tólf menn handteknir. Í þessum aðgerðum var lagt hald á 145 grömm af hassi, 65 grömm af hvítu efni, 10 E-töflur og lítilræði af amfetamíni samkvæmt tilkynningu frá lögreglu.