Indianapolis Colts sigraði í Superbowl

Indianapolis Colts sigraði Chicago Bears 29-17 í nótt í 41. úrslitaleiknum í NFL deildinni, Superbowl. Chicago komst í 14-6 í leiknum sem spilaður var við erfið skilyrði á Flórída í ausandi rigningu, en Peyton Manning og félagar hristu af sér slenið og unnu verðskuldaðan sigur í leik margra mistaka.

Manning var kjörinn maður leiksins og þaggaði niður í gagnrýnendum sínum með því að bæta nú loksins meistaratitli á ferilskrá sína. Hann skilaði 25 af 38 sendingum sínum á samherja. Leikurinn var ekki síst sögulegur fyrir þær sakir að þjálfari Colts, Tony Dungy, varð fyrsti þeldökki þjálfarinn til að vinna Superbowl í 41. árs sögu keppninnar.