Torres: Ég hefði auðveldlega geta farið til Chelsea

Framherjinn Fernando "El Nino" Torres hjá Atletico Madrid segir að hann hefði auðveldlega geta gengið í raðir Chelsea í janúarglugganum ef sig hefði langað að fara frá uppeldisfélagi sínu á Spáni. Það hafi hinsvegar ekki komið til greina fyrir sig.

"Ég er alinn upp hjá Atletico og það vill þannig til að klúbburinn er að fara í gegn um einhverja erfiðustu tíma í sögu sinni núna - og ég ber félagið á herðum mér. Það er fullt af fólki sem vill að ég fari og heldur því fram að ég sé hérna af því það sé það auðveldasta fyrir mig í stöðunni. Ég hefði samt auðveldlega geta farið héðan og unnið mér inn miklu meiri peninga og það hefði verið auðvelt fyrir mig að fara til Chelsea," sagði Torres, sem vill vera áfram hjá Atletico og reyna að koma liðinu í Evrópukeppnina.