Varað við barnaníðingi á Akureyri

Lögreglan á Akureyri leitar nú manns sem tvívegis hefur reynt að lokka átta og níu ára drengi upp í bíl sinn í grennd við Síðuskóla. Hvorugur piltanna þáði boð hans en þeir hafa gefið trúverðuga lýsingu á bílnum sem maðurinn var á en lýsing á manninum sjálfum er meira á reiki.

Drengirnir létu báðir vita og mun lögregla vera á slóð mannsins samkvæmt heimildum fréttastofu. Foreldrar barna í Síðuskóla hafa verið beðnir um það að brýna fyrir börnum sínum að fara ekki upp í bíla hjá ókunnugum og láta vita ef slíkt er í boði.

Aðeins eru tveir mánuðir síðan lögreglan á Akureyri handtók mann fyrir kynferðisbrot gegn tíu ára stelpu í bænum. Maðurinn játaði á sig brot gagnvart stelpunni en var sleppt að því loknu.