Reynsluboltarnir í liði Hauka of stór biti fyrir Stjörnuna

Bikarmeistarar Hauka unnu verðskuldaðan 26-32 sigur á Íslandsmeisturum Stjörnunnar í Meistarakeppni kvenna í Ásgarði í gær. Leikurinn var ágætlega spilaður og gaf góð fyrirheit fyrir veturinn þó að Íslandsmeistararnir hafi verið nokkuð frá sínu besta.

Leikurinn var jafn framan af en Haukar áttu góða leikkafla um miðbik bæði fyrri og seinni hálfleiks sem skildu liðin að lokum að.

Stjarnan var með yfirburðalið í fyrra en missti fjóra landsliðsmenn fyrir tímabilið, sem minnkar breiddina í liðinu til muna. „Auðvitað er erfitt að missa svo marga leikmenn en við erum að byggja upp nýtt lið á gömlum grunni og það tekur tíma,” sagði Aðalsteinn Eyjólfsson, þjálfari Stjörnunnar, að leik loknum en þetta var fyrsti ósigur Stjörnunnar síðan í janúar.

„Að tapa er tilfinning sem ég var búinn að gleyma og mér finnst hún ekki góð. Lykilmenn brugðust í dag og voru ekki nógu hungraðir til að taka annan bikarinn á jafn mörgum dögum,“ sagði Aðalsteinn en Stjarnan varð Reykjavíkur­meistari á laugardaginn.

Díana Guðjónsdóttir, þjálfari Hauka, var að vonum ánægð. „Þetta lofar góðu. Frábær vörn lagði grunninn að þessum sigri og hitt fylgdi með. Ég vildi leyfa þessum reynsluboltum sem byrjuðu leikinn að klára verkefnið og kveðja Ásgarð með sigri,” sagði Díana, sem er bjartsýn fyrir spennandi vetur.- gmi

Mörk Stjörnunnar: Sólveig Lára Kjærnested 7 (10), Rakel Dögg Bragadóttir 5/2 (8/2), Alina Petrache 5/1 (14/2), Birgit Engl 3 (6), Ásta Björk Agnarsdóttir 2 (4), Elísabet Gunnarsdóttir 2 (2), Arna Gunnarsdóttir 1 (1), Ásdís Sigurðardóttir 1 (2). Varin skot:Florentina Grecu 11/1, Helga Vala Jónsdóttir 5

Mörk Hauka: Hanna G. Stefánsdóttir 12/4 (14/4), Ramune Pekarskyte 9 (12), Sandra Stojkovic 4 (8), Erna Þráinsdóttir 3 (4), Harpa Melsted 2 (4), Nína K. Björnsdóttir 2 (5). Varin skot: Bryndís Jónsdóttir 9.