Trúi ekki öðru en að þetta hjálpi mér

Akureyringurinn Jónatan Magnússon fór fyrir viku síðan í sína fyrstu aðgerð vegna meiðsla sem hafa hrjáð hann síðan á síðasta ári. Jónatan hefur lítið getað hreyft sig vegna meiðslanna sem enginn getur sjúkdómsgreint. „Það veit enginn hvað er að mér,” sagði kappinn í nýlegu viðtali við Fréttablaðið en Brynjólfur Jónsson ákvað loks að skera hann upp.

„Hann losaði einhverjar festingar frá lífbeininu og boraði síðan nokkur göt í það. Ég veit eiginlega ekkert hvað hann var að gera,“ sagði Jónatan glaðbeittur þrátt fyrir allt. Hann hefur verið í sjúkraþjálfun síðan í ágúst á síðasta ári og er þetta fyrsta aðgerðin sem hann fer í til að sporna við meiðslunum.

Eins og áður sagði hefur enginn enn getað sjúkdómsgreint Jónatan en mesti verkurinn var í lífbeininu. Loksins er þó kominn tímarammi á Jónatan sem má byrja að hreyfa sig eftir tvær vikur. Áður vissi hann ekkert hvenær eða hvort hann gæti byrjað að æfa aftur. „Brynjólfur vill meina að þetta hjálpi og ég vona svo sannarlega að þetta sé málið. Það er ekki farið að reyna á þetta ennþá en ég verð í fullu samráði við hann eftir að ég byrja að hreyfa mig.“

Jónatan gekk í raðir St. Raphael í Frakklandi á síðasta ári og er reyndar enn samningsbundinn félaginu. Akureyri vonast eftir því að semja við kappann sem stefnir ótrauður á að spila handbolta næsta haust. „Ég vonast til að spila á tímabilinu en ég verð bara að sjá til, aðalatriðið er að ná sér góðum, hvenær sem það verður. Ég hef ekki sett niður neinn ákveðinn tíma sem ég ætla að vera byrjaður að spila, þetta snýst um að vera þolinmóður. Þetta er búið að vera svo langt ferli en ég trúi ekki öðru en að þetta hjálpi mér,“ sagði Jónatan Magnússon.

Auk þess sem Akureyri vonast eftir því að semja við Jónatan er félagið einnig á höttunum eftir nýjum markmanni eftir að Hreiðar Levý Guðmundsson samdi við Savehof. Þá misstu Akureyringar af Árna Sigtryggssyni sem samdi við Granoles á Spáni.