Eitt vörugjald á alla bíla

Stjórnmálaflokkar eru hvattir til að sameinast um að á næstu þremur árum verði lokið við hönnun og framkvæmdir við Sundabraut og Suðurlandsveg í ályktun frá aðalfundi Bílgreinasambandsins sem haldinn var fyrir skömmu.

Á fundinum var einnig fjallað um gjöld sem lögð eru á bíleigendur og var fulltrúum stjórnmálaflokka boðin þátttaka í umræðunum. Í tilkynningu sambandsins kemur fram að boðið hafi þegið fulltrúar Sjálfstæðisflokks, Framsóknarflokks og Vinstrihreyfingarinnar – græns framboðs.

Í kjölfar umræðna með stjórnmálamönnunum var samþykkt ályktun þar sem lagt er til að tekinn verði upp einn flokkur vörugjalds á allar bifreiðar og nemi gjaldið 15 prósentum af innkaupsverði. „Árið 2005 voru heildartekjur ríkisins af bifreiðum tæpir 44 milljarðar króna, eða um 10,5 prósent af tekjum ríkissjóðs,“ bendir Bílgreinasambandið á.

Bílgreinasambandið leggur þó til að áfram gildi sama gjaldtaka og áður um ökutæki til atvinnurekstrar sem eru meira en fimm tonn að þyngd. Þá mótmælir sambandið harðlega hugmyndum sem fram hafi komið um að „grænum sköttum“ verði bætt ofan á innkaupsverð bifreiða eftir magni koltvíoxíðs í útblæstri samkvæmt stöðlum sem litla sem enga samsvörun hafi við raunverulegan akstur. Sambandið segir eðlilegra að miða slíka skattlagningu við raunverulega notkun einstaklinga og fyrirtækja. „Þar endurspegla kaup á eldsneyti raunnotkun,“ segir Bílgreinasambandið.