Ég var bara kjúklingur fyrir átta árum

Anna Bryndís Blöndal getur í dag orðið Íslandsmeistari í handbolta með Stjörnunni í þriðja sinn. Anna er eini leikmaður liðsins í dag sem spilaði með meistaraliðinu 1999 en með sigri á Akureyri í dag verður liðið Íslandsmeistari í fyrsta sinn í 8 ár.

„Það er orðið langt síðan Íslandsbikarinn kom hingað. Það duttu margir út eftir að við unnum 1999 og það tók við endurnýjun sem er að skila sér núna. Þessar ungu stelpur sem hafa verið að koma inn í meistaraflokkinn eru að blómstra núna,“ segir Anna sem hefur engar áhyggjur af því að þær klúðri titlinum úr þessu.

„Þetta er komið í mínum huga. Við erum með besta liðið og mestu breiddina og mér hefði fundist það vera skandall ef við hefðum ekki unnið titilinn. Ég er samt mjög ánægð með að við skulum vera að ná honum,“ segir Anna sem segir hinar stelpurnar eiga eftir að kynnast frábærri tilfinningu. „Þegar maður vinnur þá veit maður fyrst hversu sárt það er að tapa,“ segir Anna sem segir hlutverk sitt í liðinu hafa breyst. „Ég var kjúklingur fyrir átta árum og horfði bara á stjörnurnar og fylgdi þeim. Núna er ég meira þessi sem talar og ríf stelpurnar með mér. Þetta hefur snúist við,“ segir Anna.

„Yfirleitt spilaði maður 59 mínútur en núna er maður ekki að spila nærri alla leikina. Það er samt mjög gaman og það er ótrúlegt hvað það hefur verið góð samstaða í Stjörnuliðinu miðað við það hvað það eru margir góðir leikmenn að slást um stöður í liðinu,“ segir Anna.

Anna var lítið með í fyrra en hefur verið í stóru hlutverki hjá Stjörnuliðinu í vetur. „Ég var að útskrifast sem lyfjafræðingur og var að klára lokaritgerðina mína. Maður á tvö börn og heimili og árið á undan var mjög erfitt. Ég ákvað að taka mér frí og einbeita mér að ritgerðinni og útskrifast. Ég held að ég hefði bara brunnið út ef að ég hefði reynt að spila síðasta vetur,“ segir Anna sem er í skýjunum með veturinn.

„Við erum búnar að standa okkur frábærlega í vetur og stóðumst þá pressu sem var sett á okkur. Sú sem tekur vítin skorar náttúrlega mest en að öðru leyti eru allir að skora 3 til 4 mörk í leik og þetta er að dreifast rosalega vel á hópinn,“ segir Anna sem sjálf hefur skorað 3,2 mörk að meðaltali í leik.