Curbishley skorar á Tevez að sanna sig

Alan Curbishley, stjóri West Ham, hefur skorað á Carlos Tevez og aðra varamenn liðsins að sýna hvað í þeim býr á æfingum næstu daga, því liðið muni þurfa á þeim að halda í jólatörninni framundan.

"Nú þegar jólatörnin er að byrja verða menn sem spiluðu ekki á sunnudaginn að sýna mér hvað í þeim býr á æfingum og þegar þeir fá tækifæri með liðinu, því það eru engir leikir hjá varaliðunum yfir hátíðarnar. Tevez sýndi því skilning að hann væri ekki í liðinu á sunnudaginn líkt og aðrir varamenn liðsins og ég sagði þeim að ég vildi sjá hvað þeir hefðu uppá að bjóða á æfingu daginn eftir. Menn verða að sýna mér það á æfingum að þeir eigi heima í liðinu og við vinnum út frá því," sagði Curbisley.