Undirbýr stofnun nýs dagblaðs

Sigurjón M. Egilsson hefur sagt upp störfum sem ritstjóri Blaðsins og hefur óskað eftir að fá að hætta strax um áramót. Sigurjón sagði, í samtali við fréttastofu, að hann væri að undirbúa stofnun nýs dagblaðs, en vildi ekki greina frá því hverjir útgefendur þess yrðu.

Hann segir það þó ekki verða í eigu Jóns Ásgeirs Jóhannessonar eins og getgátur hafa verið uppi um. Nýja dagblaðið hefur fengið vinnuheitið NT sem stendur fyrir Nútíminn. Það verður ekki fríblað og mun leggja áherslu á fréttaúttektir og skýringar og gerir Sigurjón ráð fyrir að það verði aðgangsharðara en önnur blöð sem fyrir eru á markaðnum.