Maliki telur írakskar sveitir tilbúnar um mitt ár

Sérstök nefnd á vegum bandarískra stjórnvalda í málefnum Íraks leggur til að hluti af hersveitum Bandaríkjanna verði kallaður heim sem allra fyrst og að aukin völd verði færð í hendur írakskra öryggissveita án þess þó að tilgreina það frekar.

Niðurstöðum nefndarinnar, sem kynntar verða næstkomandi miðvikudag var lekið í bandaríska fjölmiðla og þar kemur enn fremur fram að vera bandarísks herliðs í Írak skapi vanda í landinu og við því sé brýnt að bregðast. Þá er enn fremur lagt til að Bandaríkjamenn leiti samstarfs við Sýrlendinga og Írana til þess að koma á ró á svæðinu.

Nouri al-Maliki, forsætisráðherra Íraks, ræddi í gær og fyrradag við Bush Bandaríkjaforseta um ástandið í Írak og sagði í samtali við fréttastofu ABC að írakskar sveitir yrðu tilbúnar að taka við stjórn öryggismála í landinu um mitt næsta ár.