Beckham varð fyrir áfalli

Fabio Capello segir að erfiðleikar David Beckham á knattspyrnuvellinum undanfarið stafi af því að hann hafi orðið fyrir sálrænu áfalli við það að segja af sér sem fyrirliði enska landsliðsins og að það hafi fengið á hann að vera ekki valinn í liðið síðan á HM.

"Beckham er fyrirmyndar atvinnumaður að mínu mati, því hann gefur alltaf allt sem hann á bæði á æfingum og í leikjum. Sem þjálfari verð ég hinsvegar að skoða heildarmyndina og Beckham hefur átt erfitt uppdráttar síðan hann datt út úr enska landsliðinu. Það fékk ansi þungt á hann á sínum tíma, en nú er ég farinn að sjá mikil batamerki á honum og hann er farinn að líkjast þeim Beckham sem við öll þekkjum. Ég held að það sem fékk mest á hann hafi verið að afsala sér fyrirliðabandinu hjá enska landsliðinu," sagði Capello.