Ekki ástæða til íhlutunar vegna kvörtunar Tax Free

Samkeppniseftirlitið telur ekki ástæðu til íhlutunar vegna kvörturnar Tax Free á Íslandi vegna Global Refund á Íslandi. Bæði fyrirtæki endurgreiða virðisaukaskatt til erlendra ferðamanna hér á landi og kvartaði Tax Free árið 2003 yfir því að Global Refund misnotaði stöðu sína á markaði. Þetta kemur fram á heimasíðu Samkeppniseftirlitsins.

Taldi Tax Free á Íslandi að langvarandi taprekstur Global Refund á Íslandi væri brot á samkeppnislögum og að Global Refund reyndi með aukningu hlutafjár frá alþjóðlegu móðurfyrirtæki sínu að útrýma samkeppni á íslenkum markaði. Þessu hafnaði Global Refund og sagðist ekki hafa markaðsráðandi stöðu á markaðnum.

Samkeppniseftirlitið komst að þeirri niðurstöðu að þrátt fyrir sérstakar aðstæður á hérlendum markaði fyrir endurgreiðslu virðisaukaskatts til ferðamanna yrði ekki horft fram hjá því að Global Refund hefði ekki viðhaldið eða styrkt stöðu sína á markaði. Því væri ekki ástæða til að ætla að Global Refund hefði árið 2003 verið ráðandi á markaðnum.

Samkeppniseftirlitið telur þó ekki útilokað að Global Refund geti styrkt stöðu sína þannig að það teljist ráðandi á markaði og þá kunni málefni fyrirtækisins að koma til frekari skoðunar. Ætlar eftirlitið að óska eftir því að það verði upplýst um frekari fjárstuðning af hálfu móðurfélagsins.