Um 450 hafa kosið utan kjörfundar í prófkjöri í Suðurkjördæmi

457 höfðu kosið utan kjörfundar í opnu prófkjöri Samfylkingarinnar í Suðurkjördæmi nú á hádegi en prófkjörið fer fram á morgun. Kosið hefur verið utan kjörfundar á skrifstofu flokksins í Reykjavík, í Reykjanesbæ, á Selfossi, á Hornafirði og í Vestamannaeyjum.

Utankjörfundaratkvæðagreiðsla heldur áfram fram á kvöld og þá geta kjósendur kosið utan kjörfundar á einhverjum af tuttugu kjörstöðum í í Suðurkjördæmi á morgun ef þeir ná ekki að kjósa í sinni heimabyggð. Sautján bjóða sig fram í kjördæminu, þar af fjórir sem sækjast eftir fyrsta sætinu á listanum eftir að Margrét Frímannsdóttir tilkynnti að hún gæfi ekki áfram kost á sér til setu á þingi eftir þetta kjörtímabil.