Porato til reynslu hjá Chelsea

Ensku meistararnir Chelsea eru nú með markvörðinn Stephane Porato til reynslu en ef hann stendur sig vel fær hann það hlutverk að leysa Petr Cech af hólmi. Þar eð félagaskiptaglugginn er lokaður, getur Chelsea ekki keypt samningsbundinn leikmann en Porato þessi er með lausa samninga.

Porato er 33 ára gamall og spilaði áður með Monaco og Marseille, en hann hefur verið með lausa samninga síðan hann fór frá liði Ajaccio á Korsíku í sumar. Chelsea er sem stendur aðeins með einn leikfæran markvörð, en Hilario hefur staðið í marki liðsins síðustu tvo leiki og hefur staðið sig ágætlega. Talið er að Carlo Cudicini snúi aftur eftir meiðsli um næstu helgi.