Banaslys á Kjósarskarðsvegi í morgun

Sextíu og sex ára karlmaður lést í umferðarslysi í Kjósinni laust eftir klukkan ellefu í morgun. Maðurinn mun hafa misst stjórn á bíl sínum með þeim afleiðingum að hann fór út af veginum og valt. Talið er að maðurinn hafi kastast út úr bílnum og orðið undir honum og látist samstundis. Kona hans var með honum í bílnum og var hún flutt á slysadeild en var ekki alvarlega slösuð. Slysið varð á Kjósarskarðsvegi um sex kílómeta frá Þingvallavegi. Ekki verður greint frá nafni hins látna að svo stöddu. Þetta er 22. banaslysið í umferðinni á árinu.