Segja ættleiðingu Madonnu ólöglega

Mannréttindasamtök í Malaví hafa leitað til dómstóla þar í landi til að koma í veg fyrir að poppsöngkonan Madonna ættleiði malavískan dreng. Að sögn talsmanns samtakanna fylgdu Madonna og eiginmaður hennar Guy Ritchie ekki malavískum lögum sem kveða á um að fólk þurfi að dvelja með barni í eitt og hálft ár áður en ættleiðing er heimiluð.

Madonna og Ritchie hafa þegar fengið bráðabirgðaúrskurð frá dómstólum þar sem ættleiðingin er heimiluð. Hjónin sneru aftur til Bretlands nú um helgina en drengurinn er enn í Malaví þar sem verið er að ganga frá vegabréfum og öðrum pappírum fyrir hann.