Breytingarnar munu skerða kjör bænda

Haraldur Benediktsson, formaður Bændasamtakanna, segir aðgerðir ríkisstjórnarinnar, til lækkunar matarverðs, ganga heldur lengra en bændur höfðu búist við. Hann segir tillögurnar skerða kjör bænda verulega.

Tvær af tillögum til lækkunar matarverðs, sem ríkisstjórnin kynnti í dag, koma beint við bændur. Afurðastöðvar í mjólkuriðnaði hafi ákveðið að ná fram raunlækkun á heildsöluverði mjólkurafurða með því að halda verðinu óbreyttu næsta árið. Kúabændur eru ekki þátttakendur í að halda heildsöluverðinu óbreyttu og því er útlit fyrir að afurðastöðvarnar verði að taka þessa raunlækkun á sig. Formaður kúabænda segir að lækka verði framleiðslukostnað áður en slíkt loforð verði gefið. Hin tilllaga ríkisstjórnarinnar snýr að því að tollar á öllu innfluttu óunnu kjöti verði lækkaðir um allt að fjörtíu prósentum frá fyrsta mars næstkomandi. Hvernig útfæra á lækkanirnar liggur ekki fyrir en þrjú ráðuneyti munu vinna að útfærslunni.

Haraldur segir tillögurnar sem settar hafa verið fram, ekki samdar í samráði við bændur heldur hafi Bændasamtökin frétt í fjölmiðlum í dag hverjar tillögurnar væru.

Haraldur segir mikinn mun á þessum tillögum og þeim sem komið hafa fram á síðustu mánuðum sem hafa miðað að því að afnema tolla af búvörum að fullu. Hann segir mikilvægt að fylgst verði vel með því að þessar lækkanir skili sér til neytenda.

Þó að til lækkana komi á tollum á næsta ári verður enn kvóti á því hversu mikið má flytja inn með svokölluðum lágmarksaðgangstollum, en það magn er miðað við fimm prósent af innlendri neyslu árið 1988.