Stillt upp hjá Sjálfstæðisflokknum í Norðvesturkjördæmi

Stillt verður upp á lista Sjálfstæðisflokksins í Norðvesturkjördæmi fyrir komandi Alþingiskosningar. Þetta var ákveðið á kjördæmaráðsþingi flokksins sem fer fram á Ísafirði nú um helgina.

Flokkurinn fékk þrjá þingmenn kjörna í Norðvesturkjördæmi í Alþingiskosningunum 2003, ráðherrana Sturlu Böðvarsson og Einar K. Guðfinnsson auk Einars Odds Kristjánssonar. Þeir hafa allir lýst því yfir að þeir sækist eftir að halda áfram þingsetu.

Mjög hart var tekist á í prófkjöri flokksins fyrir síðustu kosningar og því höfðu sumir flokksmenn í kjördæminu velt því upp hvort ekki væri réttara að stilla upp á lista nú.

Tveir ungir sjálfstæðismenn hafa einnig lýst yfir áhuga á því að vera á lista flokksins í kjördæminu. Þeir Bergþór Ólason, aðstoðarmaður samgönguráðherra, og Borgar Þór Einarsson, formaður Sambands ungra sjálfstæðismanna og stjúpsonur Geirs H. Haarde forsætisráðherra.