Verðum að taka hart á Chelsea

Chris Coleman gerir sér fulla grein fyrir því að hans menn í Fulham eiga erfitt verkefni fyrir höndum á morgun þegar liðið mætir Englandsmeisturum Chelsea í úrvalsdeildinni. Fulham náði að vinna Chelsea 1-0 á heimavelli sínum í fyrra og það var fyrsti sigur liðsins á grönnum sínum í 27 ár.

"Við verðum líklega ekki að keppa við Chelsea í toppbaráttunni í vetur, en það þýðir ekki að við getum ekki tekið hart á þeim og veitt þeim harða keppni í þessum leik. Þetta eru 11 menn á móti 11 og allt getur gerst, enda man ég sjálfur eftir því hvernig var að spila svona leiki. Við höfum allt að vinna í þessum leik, en pressan er á þeim - Chelsea á að vinna þennan leik," sagði Coleman.