Unglingsstúlkur hótuðu lögreglu öllu illu

Lögreglan í Reykjavík hafði afskipti af tveimur unglingsstúlkum, 12 og 13 ára, sem létu mjög ófriðlega í fjölbýlishúsi í borginni í gærkvöld. Hvorug þeirra býr á umræddum stað en íbúar hússins kvörtuðu sáran undan framferði þeirra. Til stóð að fara með stúlkurnar til síns heima en þær brugðust ókvæða við og voru því fluttar á lögreglustöð. Á leiðinni segir lögregla þær hafa hótað lögreglumönnum öllu illu og þykir lögreglu þetta minna á uppákomuna í Skeifunni um helgina þar sem víða skorti á aga og virðingu.