Hefur engar áhyggjur af Bellamy

Rafa Benitez er í skýjunum yfir því að vera búinn að landa framherjanum Craig Bellamy á Anfield og segist ekki hafa áhyggjur af vafasamri fortíð leikmannsins, sem hefur verið duglegur við að koma sér í vandræði á ferlinum.

"Craig er í mínum huga nánast fullkominn leikmaður. Hann hefur hraða, spilar vel, tekur menn á, skorar mörk, leggur upp mörk - allt þetta eru hlutir sem ég er að leita að.

Við vitum öll að hann hefur hæfileika og að hann hefur átt það til að lenda í vandræðum, en það sem sannfærði mig um að kaupa hann var sú staðreynd að hann heldur með Liverpool og er mjög spenntur fyrir því að leggja sig allan fram fyrir félagið. Hann hefur þroskast, hann vill spila fyrir okkur og er mjög hamingjusamur með að vera kominn í mjög sterkt lið," sagði Benitez.