Fleiri forföll í enska landsliðshópnum

Það hefur heldur betur dregið til tíðinda í æfingalandsleik Englendinga og Hvít-Rússa sem fram fer í Reading í kvöld. Markvörðurinn Robert Green meiddist illa þegar hann tók útspark og Hvít-Rússarnir jöfnuðu metin í 1-1 í kjölfarið. Strax hefur fengist staðfest að Green getur ekki farið með Englendingum til Þýskalands og mun því Scott Carson taka stöðu hans í hópnum.

Þetta verður eflaust dagur sem aumingja Green vill gleyma sem fyrst, því hann kom inná í hálfleik fyrir David James og strax í upphafi gerði hann skelfileg mistök sem kostuðu nærri því mark. Skömmu síðar tók hann markspyrnu frá marki Englendinga og hneig niður af sársauka í kjölfarið efitr að hafa meiðst illa á nára. Sóknarmaður Hvít-Rússa var fljótur að bregðast við og skoraði í autt markið - og því er staðan orðin 1-1.

Sérfræðingur BBC sjónvarpsstöðvarinnar hafði á orði skömmu síðar að eftir að hafa séð frammistöðu enska liðsins fyrsta klukkutímann, væri greinilegt að Sven Göran Eriksson þyrfti ekki að vera í vandræðum með að velja byrjunarlið sitt í fyrsta leiknum á HM, því leikur enska liðsins í dag væri skelfilegur.