Yasuhide Uno, forstjóri japanska kapalfyrirtækisins, Usen Corp. ákvað í dag að kaupa sjálfur allan hlut Fuji Television Network í japanska netfyrirtækinu Livedoor fyrir 9,5 miljarða jena, jafnvirði 5,7 milljarða íslenskra króna.
Fuji Televison Network átti 12,7 prósent í Livedoor.
Með kaupunum fær Usen Corp. viðskiptasambönd Livedoor og netþjónustuveitur fyrirtækisins. Uno ætlar að skipa nefnd í lok mánaðarins sem mun útlista nánar hvernig samstarfi fyrirtækjanna verður háttað.
Vonast er til að hagur Livedoor batni við kaup Unos en gengi bréfa í fyrirtækinu hefur lækkað um 90 prósent í kauphöllinni í Tókýó í Japan og verður það afskráð úr kauphöllinni um miðjan næsta mánuð. Stærsti hluthafinn í Livedoor er Takafumi Horie, fyrrum forstjóri Livedoor, sem situr í fangelsi ásamt fjórum öðrum forsvarsmönnum fyrirtækisins fyrir að falsa afkomutölur fyrirtækisins árið 2004.
