Heiðar í byrjunarliðinu gegn Bolton

Heiðar Helguson er í byrjunarliði Fulham sem heimsækir Bolton í ensku úrvalsdeildinni í fótbolta nú kl. 13:00. Heiðar hefur hægt og bítandi verið að ávinna sér reglulegt byrjunarliðssæti í liðinu á kostnað sóknarmannsins Collins John sem vermir varamannabekk liðsins í dag.

Með Heiðari í framlínunni í dag er Bandaríkjamaðurinn Brian Mc Bride en Chris Coleman, knattspyrnustjóri Fulham lét hafa eftir sér í vikunni að góð samvinna Heiðars og Mc Bride í sókninni hefði neytt hann til að breyta leikskipulagi liðsins.

Fulham er í 14. sæti deildarinnar með 32 stig eftir 26 leiki en Bolton er í 9. sæti með 39 stig eftir 24 leiki.