Lögregla rannsakar nú hvort stuðningsmenn Björns Inga Hrafnssonar, frambjóðanda í prófkjöri framsóknarmanna í Reykjavík, hafi veitt unglingum undir lögaldri áfengi.
Lögreglumenn voru sendir að kosningaskrifstofu Björns Inga í gærkvöldi eftir að ábending barst um að þar væri fólk undir lögaldri að drykkju.
Björn Ingi segir að um einkasamkvæmi á vegum stuðningsmanna sinna hafi verið að ræða og sjálfur hafi hann ekki verið á staðnum. Sér vitanlega hafi enginn verið undir lögaldri og að þeir sem héldu samkvæmið hafi slitið því um klukkan hálftólf í gærkvöldi eftir að kvartanir bárust.
Björn Ingi Hrafnsson er aðstoðarmaður forsætisráðherra og formaður fjölskyldunefndar forsætisráðuneytisins.
