Kaupin á West Ham efst í huga

Árið sem við nú kveðjum er enn ein staðfestingin á því hve íslenskt atvinnulíf er öflugt og hversu mikil gæfa það var að binda enda á bein afskipti stjórnmálaafla að rekstri fyrirtækja. Flest öflugustu íslensku fyrirtækin starfa nú í harðri en eðlilegri alþjóðlegri samkeppni þar sem þau vaxa og eflast dag frá degi.

Á árinu 2006 kom það fyllilega í ljós að alþjóðlegu fyrirtækin okkar þola vel ágjöf en jafnframt að starfsumhverfi þeirra hér á landi er viðkvæmt. Það ætti að vera stjórnmálamönnum umhugsunarefni með hvaða hætti tryggja megi að þessi fyrirtæki verði áfram íslensk og að þau telji hag sínum best borgið með því að skrá höfuðstöðvar sínar hér á landi.

Ánægjulegt var að sjá á árinu aukna vitund stjórnenda í íslensku atvinnulífi um samfélagslega ábyrgð fyrirtækja. Augljóst er að samhliða örum vexti fyrirtækja er mikilvægt að aðrir þættir samfélagsins dafni sömuleiðis. Samfélagsleg ábyrgð fyrirtækja er sjálfsábyrgð sem tryggir öflugt, frjótt og skemmtilegt umhverfi til að starfa í.

Líti ég sjálfur um öxl eru kaup okkar Eggerts Magnússonar á enska knattspyrnufélaginu West Ham mér efst í huga. Mér kom mjög á óvart sú mikla og jákvæða athygli sem viðskipti þessi fengu í Bretlandi. Ég er sannfærður um að aukin vitund um Íslendinga í bresku athafnalífi eigi eftir fjölga til muna tækifærum fyrir öll íslensk fyrirtæki þar í landi.

Þó svo að áhugi minn á fótbolta hafi miklu skipt um þá ákvörðun að festa fé í þessari starfsemi þá má heldur ekki horfa fram hjá því að fótbolti í sjónvarpi er sá þáttur í afþreyingargreinum sem vex hve hraðast í heiminum í dag. Ég er því sannfærður um að í þessari starfsemi felast fjöldamörg viðskiptatækifæri sem West Ham mun nýta. Ætli ég minnist ársins 2006 því ekki helst fyrir það að þá runnu saman í eitt hjá mér áhugamál og starf.