„Það var alveg rosalega skemmtilegt. Erfitt en skemmtilegt,” segir Sævar Guðmundsson leikstjóri en nýverið lauk tökum á nýrri seríu af gamanþáttunum Stelpurnar sem Sagafilm framleiðir fyrir Stöð 2.
Þetta er í fyrsta skipti sem Sævar leikstýrir Stelpunum en á liðnum árum hefur hann starfað sem auglýsingaleikstjóri, auk þess að leikstýra stuttmyndum og þáttunum um Venna Páer sem er verið að sýna á Skjá einum. „Það er fyrst og fremst frábær kjarni sem stendur á bak við þessa þætti. Hópur sem gerir erfitt og annasamt verk létt og skemmtilegt, eða léttara í það minnsta” segir Sævar og er sáttur við afraksturinn.
Eitthvað er þó um ný andlit í Stelpunum í þessari nýju seríu þar sem Brynhildur Guðjónsdóttir, Bergur Þór Ingólfsson, Nína Dögg Filippusdóttir og Steinn Ármann Magnússon eru ekki lengur með. Í þeirra stað eru komin Helga Braga Jónsdóttir, Elma Lísa Gunnarsdóttir og strákarnir Sveppi, Auddi og Pétur svo það er engin vöntun á grínurum frekar en fyrr.
Sævar tekur fram að með viðbættum fyrri kjarna hafi þessi hópur unnið einstaklega vel saman. „Í raun er alveg sama hvaða vitleysingur er að leikstýra þessum snillingum.“ segir Sævar í léttum tón. „Í nýju seríunni er samt ekki mikið um að fyrri karakterar snúi aftur, enda er alltaf lagt upp með að gera nýja og ferska hluti.
Enga að síður vorum við að vinna með týpur og atriði í sama anda, með sama húmor og hefur þegar fallið svona vel í kramið hjá Íslendingum.“ Sævar er nú sestur við að klippa þættina og hefur gaman af. Stelpurnar fara í sýningu eftir áramót.
