Þjóð í hlekkjum hugarfarsins

Kvikmyndaklúbburinn Kviksaga sem starfar innan Reykjavíkurakademíunnar sýnir í kvöld fyrsta þáttinn og brot úr seinni þáttunum þremur af leikinni heimildamynd, Þjóð í hlekkjum hugarfarsins, eftir Baldur Hermannsson. Jón Þór Pétursson sagnfræðingur mun jafnframt fjalla um efni þáttaraðarinnar og viðbrögð við henni. Röðin var sýnd í Ríkissjónvarpinu vorið 1993 og var í fjórum þáttum.

Eðlisfræðingurinn Baldur Hermannsson, sem þá var aðstoðardagskrárstjóri Ríkissjónvarpsins, hafði fengið veglegan styrk frá Menningarsjóði útvarpsstöðva til að framleiða þáttaröðina Þjóð í hlekkjum hugarfarsins. Efnistök og túlkun Baldurs sætti næstu vikur miklum mótmælum en lýsingar hans á sveitalífi til forna voru miskunnarlausar og þótti mörgum hann ganga fulllangt í meðferð á staðreyndum og gögnum. „Höfundur dró ekkert undan og mismunandi aðstæðum hópa í gamla íslenska bændasamfélaginu voru gerð miskunnarlaus skil,“ segir í tilkynningu Kviksögu.

Þá voru kvikmyndagerðarmenn gagnrýnir á hvað aðstoðardagskrárstjórinn hafði fengið til framleiðslu þáttanna og töldu hann sitja beggja megin borðsins um kaup á þeim. Sýningin í kvöld hefst kl. 20 og verður á fjórðu hæð á Hringbraut 121.