Starfsmannastjóri Ford segir upp

Steven Hamp, starfsmannastjóri bandaríska bílaframleiðandans Ford og næstráðandi Alan Mulally forstjóra, ætlar að láta af störfum hjá fyrirtækinu öðru hvoru megin við næstu áramót. Hamp varð starfsmannastjóri hjá bílaframleiðandanum í nóvember á síðasta ári undir stjórn Bills Ford, fráfarandi forstjóra, sem réð hann til starfans. Þeir Hamp eru mágar.

Ford hefur ekki tilkynnt opinberlega um brotthvarf Hamps frá fyrirtækinu en Tom Hoyt, talsmaður fyrirtækisins, staðfesti uppsögnina í samtali við fréttastofuna Associated Press í byrjun vikunnar.

Ekki liggur fyrir nákvæmlega hvenær Hamp lætur af störfum né hvað hann hyggst taka sér fyrir hendur. Þá hefur bílaframleiðandinn ekki ráðið í stöðu hans.

Nokkur umskipti hafa orðið hjá æðstu yfirmönnum Ford í mánuðinum en í byrjun september lýsti Bill Ford, langafabarn stofnandans og fráfarandi forstjóri Ford, að hann hygðist stíga úr forstjórastóli og mæltist til þess að annar yrði ráðinn í hans stað til að snúa gríðarlegu rekstrartapi fyrirtækisins við. Alan Mulally, fyrrum forstjóri flugvélaframleiðandans Boeing, var ráðinn í hans stað. Ekki liggur fyrir hvort það hafi ráðið nokkru um ákvörðun Hamps.