Bandaríski seðlabankinn hefur ákveðið að halda stýrivöxtum óbreyttum í 5,25 prósentum. Þetta er annar mánuðurinn í röð sem bankinn heldur stýrivöxtum óbreyttum og telja greiningaraðilar líkur á að hækkanaferlið sé á enda.
Einn af ellefu meðlimum vaxtaákvörðunarnefndar bankans var hins vegar fylgjandi 25 punkta hækkun vaxta.
Í rökstuðningi bankastjórnarinnar fyrir ákvörðuninni segir að þrátt fyrir að hægt hafi á hagvexti í landinu verði enn fylgst náið með verðbólguþróun. Hagvöxtur í Bandaríkjunum á öðrum ársfjórðungi nam 2,9 prósentum en það er um tvöfalt minni hagvöxtur en á fyrstu þremur mánuðum ársins. Á sama tíma mældist verðbólga vestra 2,8 prósent í ágúst en hún hækkaði um 0,2 prósent á milli mánaða. Það er þó 0,8 prósentustigum yfir verðbólgumarkmiðum bandaríska seðlabankans.
Greiningaraðilar segja hafa hægst um of á hagvexti í landinu og geti það haft áhrif á hagvöxt á heimsvísu. Bankastjórnin vísar því hins vegar á bug og telur og að hagvöxtur muni haldast á þessu stigi á næstu mánuðum.
