Ég smellpassa inn í Norrköping

Sóknarmaðurinn Garðar Gunnlaugsson gekk í raðir sænska liðsins Norrköping fyrir skömmu og er að koma sér fyrir þar ytra. Hann hefur farið vel af stað í sænska boltanum og skorað tvö mörk í þeim þremur leikjum sem hann hefur leikið til þessa. Hann var ekki lengi að finna fjölina og segist smellpassa inn í liðið.

"Þetta er alltaf spurningin um að ná fyrsta markinu og sem betur fer kom það snemma hjá mér. Strax í fyrsta leik fékk ég tækifæri í byrjunarliðinu vegna meiðsla í liðinu, svo skoraði ég í öðrum leiknum og í þeim þriðja var Stebbi (Stefán Þórðarson) í banni og þá var ég settur á toppinn og náði líka að skora," sagði Garðar Gunnlaugsson sem er annar íslenski leikmaðurinn í herbúðum liðsins.

"Flestir leikmenn liðsins eru í kringum 25 ára aldurinn. Þetta er mjög opinn og skemmtilegur hópur, það komu tíu nýir leikmenn fyrir þetta tímabil og mér hefur verið tekið mjög vel. Þetta er miklu betra en ég bjóst við," sagði Garðar en Norrköping spilar leikkerfið 4-3-3. Hann var á vinstri vængnum í sóknarlínu liðsins fyrstu tvo leikina en fremstur í þeim þriðja.

Norrköping leikur í næstefstu deild í Svíþjóð og er þar í toppbaráttunni. Íslendingarnir tveir hjá liðinu voru á sínum tíma samherjar hjá liði ÍA. Síðasta vetur fór Garðar til skoska liðsins Dunfermline en þar gekk ekki nægilega vel og kom hann því aftur til Vals. Fyrstu dagarnir í Svíþjóð lofa þó góðu.

"Það hefur verið sól og 25 stiga hiti hér í Svíþjóð síðan ég kom, menn segja að þetta hafi verið besta sumarið í hundrað ár. Ég er ennþá á hóteli og er að bíða eftir að íbúðin mín losni en það gerist vonandi þann 1. september. Ég er einn hérna með litla stráknum mínum og það er svoldið erfitt að hafa hann uppi á hótelherbergi en samt fínt að hafa hann hjá mér. Þá hefur maður eitthvað að gera," sagði Garðar Gunnlaugsson.