Oprah Winfrey fær tilnefningu

Tilnefningar til friðarverðlauna Nóbels árið 2006 eru 191 talsins. Aðeins einu sinni áður hafa fleiri verið tilnefndir, en það var í fyrra þegar 199 voru tilnefndir.

Í ár eru 168 einstaklingar tilnefndir og 23 samtök eða stofnanir. Meðal þeirra sem fá tilnefningu í ár eru Martti Ahtisaari, fyrrverandi forseti Finnlands, og Susilo Bambang Yudhoyono, forseti Indónesíu, fyrir friðarumleitanir sínar á Súmötru. Rokkstjörnurnar Bob Geldof og Bono hafa jafnframt verið tilnefndar.

Þá þykir líklegt að bandaríska sjónvarpskonan Oprah Winfrey hafi verið tilnefnd, sem og Hugo Chaves, forseti Venesúela, Hjálpræðisherinn og Oxfam.