Voksne mennesker með fern verðlaun

Leikari / leikkona í aðalhlutverki

Leikkona ársins í aðalhlutverki þetta árið er Ilmur Kristjánsdóttir. Ilmur var tilnefnd fyrir leik sinn í Stelpunum.

Í umsögn dómnefndar segir: "Ilmur galdrar fram kostulegt persónusafn og kemur sífellt á óvart. Áhrifaríkur gamanleikur, án þess að verða nokkurn tímann áreynslukendur."

Leikari / leikkona í aukahlutverki

Pálmi Gestsson hlaut EDDU-verðlaun fyrir bestan leik í aukahlutverki. Pálmi hlaut tilnefninguna fyrir leik sinn í áramótaskaupinu. Í umsögn dómnefndar segir m.a.:

"Nafnarnir Halldór Laxness og Halldór Ásgrímsson verða sprelllifandi í skopstælingum Pálma, sem virðist geta brugðið sér í allra kvikinda líki."

Sjónvarpsmaður ársins

Silvía Nótt eða Ágústa Eva Erlendsdóttir er sjónvarpsmaður ársins að mati Vísisnotenda og þeirra sem fylgdust með beinni útsendingu frá verðlaunahátíð EDDU í kvöld. Forval fór fram hér á Vísi og þá kannaði IMG Gallup einnig hug landsmanna. Í kvöld fór svo fram SMS-kosning milli þeirra fimm einstaklinga sem hlutu flestar tilnefningar á Vísi og hjá Gallup og varð Silvía Nótt hlutskörpust í þeirri kosningu.

Skemmtiþáttur ársins

Sjáumst með Silvíu Nótt er skemmtiþáttur ársins að mati dómnefndar ÍKSA.

"Einstæð leiktúlkun Ágústu Evu Erlendsdóttur í hlutverki Silvíu Nótt. Traust persónusköpun, frumlega framsettur boðskapur og gagnrýni ásamt snarpri og margræðri kvikmyndavinnslu eru ástæður þess að Sjáumst með Silvíu Nótt er tilnefnd til edduverðlauna. Þrátt fyrir að finna megi fyrimyndir eru þættirnir einstaklega frumlegir og bera hugmyndaflugi íslenskra listamanna gott vitni," segir í umsögn dómnefndar.

Sjónvarpsþáttur ársins:

Sjálfstætt fólk Jóns Ársæls og Steingríms Jóns Þórðarsonar er sjónvarpsþáttur ársins.

"Við fáum ekki leið á Sjálfstæðu Fólki. Jóni Ársæli og Steingrími sýna okkur innilegar nærmyndir af einstöku fólki í hverjum þættinum af fætur öðrum. Lengi megi þeir kappar halda áfram að gera gott sjónvarpsefni," segir dómnefnd um Sjálfstætt fólk.

 

 

 

Heimildamynd ársins

Africa United eftir Ólaf Jóhannesson er heimildamynd ársins að mati Vísisnotenda og dómnefndar ÍKSA, íslensku kvikmynda- og sjónavarpsakademíunnar.

Um myndina segir dómnefnd: "Skemmtileg mynd um fótboltalið í þriðju deild. Fjölbreytt persónugalleríið lifnar á tjaldinu og ástríða þjálfarans og leikmannanna smitar áhorfandann. Myndin er vel unnin á allan hátt og sagan gengur upp í lok myndarinnar."

Handrit ársins

Dagur Kári Pétursson og Rune Schött hlutu EDDU fyrir handiritið í myndinni Voksne Mennesker.

Dómnefnd segir eftirfarandi um handritið: "Handritið er stútfullt af óborganlegum senum og hugmyndum sem bæta upp fyrir brotakenndan söguþráðinn. Vel skrifuð og á köflum drepfyndin samtöl. Höfundarnar vinna markvisst með efniviðinn svo úr verður sterk saga sögð með áreynslulitlum og skemmtilegum hætti."

 

 

 

Kvikmynd ársins:Voksne Mennesker er kvikmynd ársins að mati dómnefndar Íslensku kvikmynda- og sjónvarpsakademíunnar.

"Heillandi lýsing á þroskaferli iðjuleysinga. Persónusköpun frumleg með skemmtilegri áherslu á smáatriði. Myndin vekur til umhugsunar og persónurnar vekja samúð hjá áhorfandanum.

Kvikmyndataka er góð og annað útlit myndarinnar skemmtilega stílfært. Vel leikin kvikmynd sem heillar með sterkri stemmingu, hvíld og vissu látleysi," segir dómnefnd um Voskne Mennesker.

Leikstjórn ársins:Dagur Kári Pétursson hlýtur EDDU-verðlaun í ár sem leikstjóri ársins fyrir mynd sína Voksne Mennesker.

Umsögn dómnefndar: "Dagur Kári skapar mjög sérstakt og leiftrandi ljóðrænt andrúmsloft með mynd, tónlist og leik og tekst afar vel að nýta sér styrk einfaldleikans í frásögn sinni. Hann er óhræddur við að brjóta hefðir og margar senur í myndinni eru afgreiddar á ógleymanlegan hátt."

Leikið sjónvarpsefni ársinsStelpurnar hlutu EDDU-verðlaun í flokknum leikið sjónvarpsefni ársins.

Í umsögn dómnefndar segir m.a.; "Grínþáttur með stuttum bröndurum sem er vel unnin í alla staði. Grafík, kvikmyndataka og tónlist skapa skemmtilega umgjörð og stemmningu. Áhersla er lögð á hraða og vandaða tæknivinnu. Leikur til fyrirmyndar."

Tónlistarmyndband ársinsCrazy Bastard í flutningi strákanna í 70 mínútum og Quarashi er tónlistarmyndband ársins.

Umsögn dómnefndar: "Leikstjórn, leikur og tæknileg útfærsla sannfærandi þó efnistök séu ekki ný af nálinni."

Myndataka og klipping"Þetta er heiður - takk fyrir mig"; sagði Bergsteinn Björgúlfsson þegar hann tók við EDDU-verðlaununum fyrir myndatöku í Gargandi snilld.

"Myndatakan er gargandi snilld. Listræn og fagleg vinnsla konfekt fyrir augað," sagði í umsögn dómnefndar.

Stuttmynd ársins:Töframaðurinn er stuttmynd ársins. Leikstjóri hennar er Reynir Lyngdal, handrit skrifaði Jón Atli Jónasson en framleiðendur voru Hrönn Kristinsdóttir og Snorri Þórisson.

Umsögn dómnefndar; "Draumkennd og áhrifarík lýsing á heimi barns sem býr við ofbeldisfullar heimilisaðstæður. Falleg kvikmyndataka, lýsing og leikmynd. Sterk stemmning myndast með vel heppnaðri tónlist, góðum leik og einfaldri en áhrifaríkri sögu."

Hljóð og tónlistDagur Kári Pétursson tók við EDDU-verðlaunum fyrir tónlist í mynd sinni Voksne Mennesker.

Umsögn dómnefndar: "Frumleg og vönduð tónlist sem gegnir veigamiklu hlutverki í að skapa andrúmsloft myndarinnar ekki síst er notkunin á tónlist Bachs vel heppnuð. Hljóð gott og skapar stíl."

Útlit myndar:Brúðugerðin í Latabæ hlaut EDDU í flokknum útlit myndar.

Dómnefnd segir brúðurnar stórkostlegar, lifandi og skemmtilega persónuleika.

Hvatningarverðlaun Landsbanka Íslands:Hið ljúfa líf, stuttmynd eftir Elvar Gunnarsson, hlaut hvatningarverðlaun Landsbanka Íslands. Handritið skrifuðu Elvar Gunnarsson, Kristinn Þeyr Magnússon, Oddný Helgadóttir og Anton Máni Svansson.

Myndin fjallar um tvær einmana sálir sem hittast fyrir tilviljun á jóladag og komast að því að þau eiga ýmislegt sameiginlegt þrátt fyrir að vera ólíkir einstaklinga.

"Hið ljúfa líf er heilsteypt og skemmtileg mynd þar sem góður leikur, einlægt og sannverðugt handrit liggja til grundvallar metnaðarfullri vinnsluaðferð," segir m.a. í umsögn dómnefndar.