Bílar út af í krapa

. Víða um land er illfært á heiðum enda er þar vetur genginn í garð. Í umdæmi Sauðárkrókslögreglunnar urðu tvö umferðaróhöpp í gær, annað á Siglufjarðarvegi en hitt á Sauðárkróksbraut. Bílar lentu utan vegar vegna krapa og veðurskilyrða en engan sakaði. Mikil umferð var á svæðinu vegna Laufskálarétta sem eru um þessa helgi. Á Siglufirði varð bílvelta í Mánárbeygju í fyrrakvöld. Ökumaður og farþegi voru tveir í bílnum og var farið með þá til skoðunar á heilsugæslustöðina en meiðsl þeirra reyndust ekki alvarleg. Bíllinn var hins vegar óökufær eftir og var fluttur með kranabíl til Siglufjarðar. Á Egilsstöðum hafa ökumenn lent í vandræðum og björgunarsveitin á Seyðisfirði var kölluð út til aðstoðar ökumanni jeppabifreiðar sem ekki var nógu vel búin til aksturs í snjó og slyddu.