Keppt í Indianapolis 2006

Forráðamenn Indianapolis kappakstursins í Formúlu 1 í Bandaríkjunum ætla ekki að láta hneykslið sem varð á brautinni í ár koma í veg fyrir að keppnin fari fram þar á næsta ári og hafa staðfest að keppni næsta árs fari fram þann 2. júlí næsta sumar, ef Alþjóða Akstursíþróttasambandið gefur grænt ljós á það. "Indianapolis-brautin verður klár fyrir keppnina á næsta ári og hér á bæ hafa menn aldrei lagt árar í bát við að auka veg og virðingu íþróttarinnar í Bandaríkjunum. Við látum uppákomuna í sumar hvergi á okkur fá og erum tilbúnir fyrir framhaldið," sagði talsmaður keppnishaldara í Indianapolis.