Beðið eftir Heinze

Forráðamenn Manchester United bíða nú í ofvæni eftir niðurstöðum úr læknisrannsóknum sem varnarmaðurinn Gabriel Heinze fór í síðdegis, en talið er að hann verði frá keppni í lágmark nokkrar vikur. Heinze meiddist í leik Manchester United og Villareal í Meistaradeildinni í gærkvöldi og þurfti að fara af leikvelli. Gert er ráð fyrir að Kieran Richardson komi inn í liðið í stað Heinze í leiknum gegn Liverpool um helgina. "Ef grunur minn reynist réttur, mun Heinze verða frá í nokkrar vikur," sagði Alex Ferguson nú síðdegis, en niðurstöðu er að vænta í málinu í kvöld eða fyrramálið.