Leit út eins og stórbruni

Allt tiltækt slökkvilið höfuðborgarsvæðisins var kallað út um klukkan hálfsjö í morgun vegna bruna í atvinnuhúsnæði við Fiskislóð í Reykjavík. Einnig þurfti að slökkva eld við Melabúðina á þriðja tímanum í nótt. Þegar slökkviliðið kom á staðinn við Fiskislóð leit út fyrir að um stórbruna væri að ræða. Björn Björnsson, stöðvarstjóri hjá slökkviliðinu, stjórnaði aðgerðum á vettvangi. Hann segir að þegar slökkviliðið hafi komið á vettvang hafi svartan reyk lagt frá húsinu og hann hafi verið kominn út um þakskeggið. Reykkafarar hafi verið sendir inn til að reyna að finna eldi og hann hafi fundist á endanum innst í húsinu. Að sögn Björn er húsnæðið eitt opið rými en önnur hæð í hluta skemmunnar en þetta hafi verið kjaftfullt af reyk. Í ljós kom að eldur logaði í bíl innst á neðri hæðinni. Þegar eldurinn var fundinn tók síðan stuttan tíma að ráða niðurlögum hans, en nokkurn tíma mun taka að reykræsta, enda barst reykurinn um allt húsið. Rjúfa þurfti þakið á nokkrum stöðum til að hleypa mekkinum út, en hann hékk að miklu leyti uppi undir mæni eftir að eldurinn hafði verið slökktur. Engin starfsemi er í húsnæðinu eins og er, en eigendur þess eru að breyta því í verslunar- og þjónustuhúsnæði. Tjónið er engu að síður mikið, aðallega vegna reyks. Og slökkviliðið hafði í nógu að snúast í nótt, því það var kallað út að Melabúðinni í Reykjavík á þriðja tímanum. Þar logaði eldur í lagnaherbergi sem notað er sem geymsla. Vel gekk að slökkva eldinn, en nokkur eldur og reykur bárust með lögnum inn í verslunina. Starfsfólk þreif og ræsti það allt saman í morgun og opnaði verslunin á hádegi eins og ekkert hefði í skorist. Rannsókn á eldsupptökum á báðum stöðum er í höndum rannsóknardeildar