Kuyt fer hvergi
Dirk Kuyt, framherjinn knái hjá Feyenoord, hefur ákveðið að vera um kyrrt hjá félaginu þrátt fyrir mikinn áhuga ýmissa knattspyrnufélaga á honum. Kuyt lék frábærlega með Feyenoord í fyrra og var talið líklegt að hann myndi fara til einhvers stórliðs í Evrópu en á endanum ákvað Kuyt að vera áfram í Hollandi. "Ég hef hugsað mikið um þetta enda var auðvitað freistandi að leik með stórliði því það er það sem allir leikmenn stefna að. En ég lít svo á að Feyenoord sé stórlið sem geti náð góðum árangri í Evrópukeppni á næstu árum. Það er ekkert því til fyrirstöðu ef allir sem starfa hjá félaginu leggjast á eitt um að koma félaginu í allra fremstu röð. Og ég hef mikinn áhuga á því að taka virkan þátt í því," sagði Kuyt í samtali við blaðamenn.
