Frívaktarlögga sneri þjóf niður

Lögreglukona á frívakt sneri niður þjóf á veitingastaðnum American Style í gærkvöld. Maðurinn, sem var sagður í annarlegu ástandi, reyndi að stela veski af ófrískri konu en var fljótt snúinn niður af lögreglukonunni. Hún hélt honum niðri með annarri hendi meðan hún kallaði til lögreglu á vakt sem kom og færði manninn í fangageymslur. Talsvert var að gera hjá lögreglunni í Reykjavík í gærkvöld. Átta ára drengur ristarbrotnaði í Reyrengi í Grafarvogi þegar hann hljóp inn í hliðina á bifreið. Tvær níu og tíu ára stúlkur tilkynntu að maður hefði girt niður um sig fyrir framan þær í suðvesturhluta borgarinnar og hlaupið á brott, lögregla hefur greinargóða lýsingu á honum. Þá voru þrjú innbrot kærð: í bíl, herbergi og loks íbúð þar sem fartölvu, stafrænni myndavél og 20 þúsund krónum í peningum var stolið.